തൃശൂര്: പിതാവിനെ കൊലപ്പെടുത്തി സെപ്റ്റിക് ടാങ്കില് തള്ളിയ കേസില് ഏഴു വര്ഷത്തിനു ശേഷം രണ്ട് മക്കള് പിടിയില്. മാര്ത്ത മറിയം പള്ളി, ഊരകം ക്ഷേത്രം എന്നിവിടങ്ങളില് നടന്ന കവര്ച്ചകളിലെ കൂട്ടുപ്രതി ഒല്ലൂര് വട്ടപ്പറമ്പില് സുരേന്ദ്രനെ കൊന്ന കേസിലാണ് മക്കളായ സുഭാഷ് (30), സുരേഷ് (28) എന്നിവര് അറസ്റ്റിലായത്.
മാര്ത്ത മറിയം പള്ളി, ഊരകം ക്ഷേത്രം കവര്ച്ചക്കേസില് 16 വര്ഷങ്ങള്ക്കു ശേഷം പ്രധാന പ്രതികളായ ജയതിലകനും അനിലനും അറസ്റ്റിലായപ്പോഴാണ് ഈ കേസിന് തുമ്പായത്. പൊലീസിനെ കബളിപ്പിച്ച് നാട്ടില്നിന്നു മുങ്ങിയ സുരേന്ദ്രന് കര്ണാടകയിലെ റിപ്പണ്പേട്ടയില് ഒളിവിലായിരുന്നു. ഇവിടെ വച്ച് മക്കള് ഇരുവരും ചേര്ന്ന് 2004ല് പിതാവിനെ കൊലപ്പെടുത്തിയെന്നാണു പൊലീസ് വിശദീകരണം.
അമിത മദ്യപാനിയായ സുരേന്ദ്രന് വീട്ടില് സ്ഥിരമായി വഴക്കുണ്ടാക്കിയിരുന്നു. ഇതിനിടയിലുണ്ടായ അടിപിടിയിലാണ് മരണം. തുടര്ന്ന് ജഡം സെപ്റ്റിക് ടാങ്കില് മറവു ചെയ്യുകയായിരുന്നു. മാര്ത്ത മറിയം പള്ളി, ഊരകം ക്ഷേത്രം എന്നിവയ്ക്ക് പുറമെ തൃശൂര്, കോട്ടയം ജില്ലകളിലെ എടയാട്ട് വിഷ്ണു ക്ഷേത്രം, കൈനൂര് ശിവക്ഷേത്രം, കുറ്റുമുക്ക് ശിവക്ഷേത്രം, മുതുവറ ശിവ ക്ഷേത്രം, പാമ്പാടി ദേവിക്ഷേത്രം, വെള്ളൂര് ഭഗവതി ക്ഷേത്രം എന്നിവിടങ്ങളില് സുരേന്ദ്രനും ഭാര്യാസഹോദരന് ജയതിലകനും ചേര്ന്നാണ് കവര്ച്ച നടത്തിയിരുന്നത്.
1996ല് മാര്ത്ത മറിയം പള്ളി കവര്ച്ചയെ തുടര്ന്ന് ജയതിലകന് അറസ്റ്റിലായതോടെതാണ് അപകടം മണത്ത സുരേന്ദ്രന് കുടുംബ സമേതം ഷിമോഗയിലേക്ക് നാടുവിട്ടത്. രാഘവന് എന്ന പേരില് കൃഷിപ്പണികള് ചെയ്താണ് അവിടെ ജീവിച്ചിരുന്നത്. എഎസ്ഐ കെ.ജെ. ചാക്കോയുടെ നേതൃത്വത്തില് പൊലീസ് സംഘം ഷിമോഗയ്ക്കു സമീപമുള്ള റിപ്പണ്പേട്ടയിലെ കുഗ്രാമത്തില് ക്യാംപ് ചെയ്താണ് അന്വേഷണം പൂര്ത്തിയാക്കിയത്.
തൃശൂരിനെ പിടിച്ചു കുലുക്കിയ മാര്ത്ത മറിയം പള്ളി, ഊരകം ക്ഷേത്രം എന്നിവിടങ്ങളിലെ കവര്ച്ചയുടെ പേരില് പിടിയിലായ ശേഷം ജാമ്യത്തില് ഇറങ്ങി മുങ്ങിയ ജയതിലകനും അനിലനും സുരേന്ദ്രന്റെ സഹായത്തോടെ തൊട്ടടുത്ത ഗ്രാമത്തില് ഒളിച്ചു കഴിയുകയായിരുന്നു. സുരേന്ദ്രന്റെ കൊലപാതകത്തിനു ശേഷം വീട് വിറ്റ സംഘം തൊട്ടടുത്തുള്ള ഗൗട്ടൂരി ഗ്രാമത്തിലാണ് ജീവിച്ചിരുന്നത്. ഇതിനിടെ സുരേഷ് അടിമാലിയിലേക്ക് ഉപജീവനാര്ഥം കുടിയേറി. സുഭാഷ് റിപ്പണ്പേട്ടില് കൂലിപ്പണി ചെയ്ത് ജീവിക്കുകയായിരുന്നു.
ജയതിലകനെയും അനിലനെയും ജാമ്യത്തില് ഇറക്കുന്നതിന് വേണ്ടിയാണ് സുഭാഷ് തൃശൂരില് എത്തിയത്. കല്ലൂരിലെ ബന്ധുവിന്റെ വീട്ടില്നിന്നാണ് സുഭാഷ് അറസ്റ്റിലായത്. ഷിമോഗയില് നടന്ന കൊലപാതകമായതിനാല് പ്രതികളെ കര്ണാടക പൊലീസിന് കൈമാറുമെന്ന് എസ്പി പി.എന്. ഉണ്ണിരാജന് അറിയിച്ചു. ക്ഷേത്ര കവര്ച്ചാ സംഘം അംഗങ്ങളായ പി. ശങ്കരന് കുട്ടി, ടി.ആര്. ഗ്ലാഡ്സ്റ്റണ്, കെ. സൂരജ്, ലിന്റോ ദേവസി, സുബീര് കുമാര് എന്നിവരാണ് റിപ്പണ്പേട്ടില് താമസിച്ച് അന്വേഷണം നടത്തിയത്.